打廣東話字又快又準又易學？試下粵語反切輸入法！

倉頡就難學，速成就揀字揀到傻，粵拼就香港人冇用開（雖然我強烈建議各位讀者用一粒鐘學咗佢），漢語拼音就……唔使講啦。

唔少人都要喺手機手寫先寫到粵字 ... 聯繫我 電子快訊 接收每月文章、短片、集數，同埋《絮言．狂想》各主持出版嘅內容總結 Firstnameorfullname Email  Bycontinuing,youaccepttheprivacypolicy Search Categories 去片 學外語 文法隨口噏 生活 粵語隨想 絮言．狂想 音樂 RecentPosts 絮言．狂想#035：官長，的是 去英國．自由鳥：三大無合約電話卡，親身評測！（2022） 絮言．狂想#034：如果你自己有誤導畀，會我你都唔幫可以 絮言．狂想#033：廣東話達人挑戰陰謀大拆解？（客串：阿葆、Oscar） Eeeeeeee！絮言．狂想第二次直播 Archives May2022 April2022 March2022 February2022 January2022 December2021 November2021 October2021 September2021 August2021 July2021 June2021 May2021 April2021 March2021 February2021 January2021 December2020 November2020 October2020 September2020 August2020 July2020 AboutLatestPostsIsrael語言迷、鋼琴家、作曲家、香港人。

透過認識世界嚟認識自己。

寫下我嘅語言探險，同埋推廣粵語之樂。

LatestpostsbyIsrael(seeall) 絮言．狂想#035：官長，的是-16/05/2022 去英國．自由鳥：三大無合約電話卡，親身評測！（2022）-01/05/2022 絮言．狂想#034：如果你自己有誤導畀，會我你都唔幫可以-22/04/2022 打廣東話真係好難。

唔似得上面有漢拼、台灣有注音，粵語有萬七咁多種輸入法，種種都有好大嘅弊處。

倉頡就難學，速成就揀字揀到傻，粵拼就香港人冇用開（雖然我強烈建議各位讀者用一粒鐘學咗佢），漢語拼音就……唔使講啦。

唔少人都要喺手機手寫先寫到粵字，又或者會打咗啲「o係」「o羅」噉嘅奇怪字出嚟。

你問我嘅話，對於廣東話嘅母語者，就算唔集體轉過去，都好應該試一試粵語反切輸入法。

佢淨係需要記26個鍵，唔使學拆字、唔使學拼音，揀字就淨係需要喺同音字之間揀，最緊要嘅係兩個掣就打完一個字，又快又準又易學。

我覺得簡直係粵文輸入嘅未來。

不過首先，都要同大家講解下咩叫粵切先。

乜嘢係粵語反切？ 反切係以前啲韻書、字典用嚟表達發音嘅方法，簡單講就係攞兩個字，各取半個音，砌埋就係你想要嘅音。

例如「廣」字就係「古晃切」，攞咗「古」嘅開頭，「晃」嘅後半，加埋就係「廣」。

當然，睇反切嘅前提，係你要識嗰兩個字嘅發音。

同埋，呢啲韻書描述嘅係以前嘅漢語，同現今嘅廣東話不盡相同。

粵切輸入法就係採用同一個概念，不過換成現代廣東話音。

譬如想打個「廣」字，首先諗下鍵盤上邊個字開頭同佢一樣，於是㩒「瓜」（X）。

然後，諗下有邊個字同「廣」押韻，就㩒「方」（J），已經可以揀字。

下面會詳細講點樣快速學習。

（留意：如果你喺社交媒體見過所謂「粵切字」，同粵切輸入法係冇啦掕嘅。

前者係用粵拼打佢哋嘅新創字，後者係用嚟打漢字。

） 安裝 要安裝粵切輸入法，首先要裝RIME。

RIME係一個平台，就彷彿係一個AppStore，上面可以裝好多唔同嘅漢字輸入法，互相切換，包括傳統嘅倉頡之類，至到用家自創嘅粵語、台語輸入法等等都有。

下面有唔同系統嘅下載連結： Windows|MacOS|Linux|Android|iOS 然後，去呢度單撈粵語切音輸入法，根據你個RIME嘅版本指示，將佢啲快勞抄入去你個RIME嘅文件夾裏面。

例如Windows嘅話，就㩒開始>小狼毫輸入法>【小狼毫】用戶文件夾。

最後，切換去RIME輸入法，喺「輸入法設定」裏面剔粵語反切，就可以開始用。

如果你有唔止一個RIME嘅輸入方案，打字嘅時候㩒Ctrl+`（即係Esc下面嗰一捺），就可以切換。

點樣學習粵語切音輸入法？ 先睇圖，後講解： 你會見到每個鍵分咗左右兩排，分別對應打一個字嘅幾個步驟： 左邊係反切嘅上字，即係聲母，即係「瓜方→廣」個「瓜」。

你會留意到呢啲字冚唪唥都係「吖」尾，即係想你唔好理尾音，淨係諗開頭個音。

打字嘅時候，首先就諗住左邊呢啲字嚟㩒。

例如想打「廣」，就㩒X。

好多呢啲上字都係對應返英文鍵盤嘅字母，例如S、D、F係沙、打、化，J、Z、C係也、乍、叉（識粵拼嘅話會熟悉，唔識嘅話都冇所謂），A係阿（零聲母）。

「牙」上面有「五」，「馬」上面有「唔」，呢啲係用嚟打「吳、吾」之類，淨係得鼻音嘅字。

想打呢啲字嘅話，直接㩒兩下呢個掣，可以skip第二步。

特別要留意嘅係「古」、「官」等，要用「瓜」而唔係「加」（你試下讀出嚟都有啲似），如果唔係會變咗「稿」、「捐」。

數字陣間先講。

右邊就係個下字，即係韻母，即係「瓜方→廣」個「方」。

記住，你要諗嘅係邊個字押韻。

你可以直接睇住幅圖嚟學，但係如果你熟悉拼音嘅話，可以睇我解釋。

今次，佢有一部份係根據英文鍵盤而排列，其餘嘅就係類近嘅韻母會擺埋一齊。

簡單嘅韻母係跟返英文字母：A、E、I、O、U分別係亞、耶、肆（「皮」以前同「肆」押韻）、火、夫（「刀」以前同「夫」押韻）。

Y係「魚」（粵拼或者國際音標嘅串法），順便加埋「靴」。

你睇返幅圖，係冇顏色嗰啲掣。

最頂嗰排係-n音，綠色掣。

中間嗰排有紫色嘅-u音，同埋紅色嘅-ng音。

最底係黃色嘅-i音，同埋藍色嘅-m音。

入聲字點算呢？你諗下嘅話，每個入聲字都有對應嘅鼻音。

譬如你試下講「因」，唔畀個鼻噴氣出嚟嘅話，就變咗「一」。

所以-t對應-n，-p對應-m，-k對應-ng。

你㩒韻母嘅時候，順手㩒埋shift（即係好似打英文大楷噉），就變咗相對應嘅入聲。

例如我想打「獨立」，讀出嚟係「打木」切、「拉甲」切，我㩒嘅就係dKlB。

打唔打聲調由你決定，打咗就少啲字揀噉解。

如果你唔熟粵語六聲，可以直接跳過。

你亦可以因應佢多唔多同音字嚟決定，又或者學我，直情習慣咗諗都唔使諗，打埋佢。

聲調好簡單，就係用返上字（聲母）用淨嗰6個掣：ERYUIO，都係喺最頂嗰排，一字排開。

打完上字下字後，直接㩒聲調鍵，佢就會自動加埋個聲調上去，唔會以為你打緊下一個字。

小心唔好揀錯數字鍵，數字鍵係揀字。

最後，建議你打完成個詞語先揀字（即係㩒空格鍵space），因為佢會根據你打緊嘅詞語，篩走唔關事嘅同音字。

例如唔講唔知「鍾」有112個同音字，但係你打晒「鍾意」兩個字（乍工1也肆3／zkejiy），就會出咗啱嘅字畀你。

總評：真係好快咩？ 係，真係好快。

我平時打倉頡，為咗打我哋語言節目嘅逐字稿，都已經超過每分鐘100字。

但係倉頡多數字都要三至五個掣，粵切兩三個掣就搞掂，好有機會可以超越倉頡添。

我尤其鍾意呢個輸入法嘅設計，將粵語嘅聲母、韻母完美fit入英文鍵盤26個掣裏面，佮佮冚，彷彿粵語係為咗呢個鍵盤而創造噉樣。

最緊要嘅係講廣東話嘅人，不論老幼，只要識得發音、識得押韻，就好快可以學得識一個咁勁咁方便嘅輸入法。

係咪好有興趣試下呢？安裝完後，為咗練習，不妨喺下面留個言，講下你覺得易唔易記吖！ ★★★★★ AboutIsrael 語言迷、鋼琴家、作曲家、香港人。

透過認識世界嚟認識自己。

寫下我嘅語言探險，同埋推廣粵語之樂。

ViewallpostsbyIsrael→ Postnavigation PreviousPreviouspost:絮言．狂想#009：一年之計做乜春（客串：靳禮赫）NextNextpost:絮言．狂想#010：字幕口語化．IELTS死全家